Gikatakdang tutukan sa kagamhanang dakbayan sa Sugbo ang pagbawi sa mga lote nga gipanag-iya sa dakbayan nga adunay revenue-generating income.
Gipahibalo kini ni Cebu City Acting Mayor Raymond Alvin Garcia atol sa usa ka press conference niadtong Martes, Agosto 27, 2024.
Si Garcia niingon nga nagmugna siya og task force alang sa pagbawi sa mga lote nga gipanag-iya sa siyudad aron tutukan ang pagbawi sa pagpanag-iya sa mga kabtangan nga magamit pa sa City Government.
Gilangkuban ang maong task force sa mga sakop gikan sa nagkalain-laing buhatan sa dakbayan nga naglakip sa City Administrator’s Office, City Legal Office, City Planning and Development Office, Land Management Office, City Treasurer’s Office, Department of General Services, City Engineering Office, Assessor’s Office, Division for the Welfare of the Urban Poor, ug ang Committee on Infrastructure.
Sa eksklusibong pakighinabi sa Bombo Newsteam kang Cebu City Councilor Jerry Guardo, kinsa Chairman sa Committee on Infrastructure sa Sagguniang Panlungsod sa dakbayan diin gitataw niini nga daghan kini sila og nakita nga property sa dakbayan nga gi-okupar na sa mga lumulupyo ilabi na sa mga kadalanan nga hinay-hinay kagamay tungod sa illegal settlement.
Dugang sa konsehal nga nagkigtabo na kini sa namugna nga task force sa ikatulong higayon og napa-ambit sa acting mayor ang sugyot sa hingpit nga dinalian aksyon bahin sa pagbawi sa mga luna.
Subay pa sa kasayuran sa konsehal nga sa pag-una magsugod lang kini sa mga pagtukod og tulda hangtod maabot ang panahon nga gigama na sa mga residente uog garahean ingon man apil na sa ubang bahin sa ilang panimalay.
Ang inisyatiba nagtumong sa pagdokumento sa tanang pagbalhin sa pagpanag-iya sa mga gidonar nga lote ngadto sa City Government.
Ang recovery effort naglakip usab sa mga propriety nga nasakmit sa siyudad tungod sa wala mabayri nga buhis, nga sa balaod kinahanglang isubasta nga ang kita moadto sa panudlanan sa siyudad.
Ang wala mabaligya nga mga kabtangan sa subasta awtomatik nga gidonar sa City Government.
Plano sab sa kagamhanang kung mabawi na ang mga luna sa pagpatukod sa proyekto niini nga socialized housing.
