Anaa na sa 35% ang kinatibuk-ang kalamboan sa bag-ong pasilidad sa Carbon Market, diin nahuman na usab ang mga kritikal nga bahin sa proyekto sama sa pundasyon ug mga excavation works, ug ang pagtukod sa ikatulong Technological/Floor level nagpadayon na karon, sumala ni Jynx Chanjueco, Corporate Affairs sa Cebu 2 World Megawide.
Gipahayag ni Chanjueco nga mas paspas ang pag-uswag sa konstruksyon tungod sa paggamit sa precast technology, diin ang Megawide ang usa sa mga pultahan o ‘pioneer’ niining modernong pamamagi.
Matod niya, tungod kay kadaghanan sa mga precast nga materyales napadala na, ang pangunang trabaho mao na lang ang pag-instalar niini, nga sama ra sa pag-assemble sa mga “Lego blocks.”
Dugang niya nga sa kinatibuk-an, ang pundo para sa tibuok nga renobasyon ubos sa Joint Venture Agreement (JVA) mobalor og P8.5 bilyon para sa infrastructure project, nga adunay hangtod sa upat ka hugna. Namatikdan usab ni Chanjueco nga nagsunod sila sa polisiya nga “no relocation, no vendor movement”, diin ang mga vendor makabalhin lang kung andam na ug mahuman na ang bag-ong pasilidad.
Base sa rekord gikan sa Office of the City Markets, nasayran nga adunay gibana-bana nga 1,700 ka regular nga mga tindera ug 2,500-3,500 ka mga ambulant vendor.
Kabahin sa mga bayranan sa merkado, gipasabot ni Chanjueco nga ang kasamtangang market code karon naningil og P8.50 kada metro kada adlaw. Bisan pa sa nahisgutang mga pagbag-o sa revised 2023 Market Code, ang Megawide misaad nga walay pagtaas sa bayranan para sa mga vendor hangtod sa 2028, ug giklaro nga ang gobyerno sa siyudad ug LGU lamang ang adunay katungod sa pagtino sa pormal nga bayranan ug dili ang Megawide.
Nagkanayon usab si Chanjueco nga aron malikayan ang direktang kompetisyon sa negosyo, ang lower ug upper ground floors magpabilin nga gitagana alang sa public market. Samtang ang ikaduhang Competition Floor igahin alang sa mga dugang nga serbisyo sama sa money transfer, banking, salons, cafes, ug usa ka fitness hub nga adunay pito ka mga korte ug usa ka basketball court sa taas nga andana nga magamit usab alang sa lain-laing mga kalihokan ug okasyon.
Gipasabot usab ni Chanjueco nga samtang ang pormal nga pagbalhin sa bilding himuon sa Disyembre, ang pagbalhin sa mga vendor dumalaon gihapon sa LGU pinaagi sa City Market Office, diin ang kompanya motabang sa pag-finalize sa zoning.
Sa katapusan, gipasalig sa Megawide nga motuman kini sa tanan nga gikinahanglan nga occupancy permits ug safety standards gikan sa mga ahensya sa gobyerno aron masiguro nga ang pasilidad 100% luwas sa dili pa kini pormal nga okupahan ug gamiton sa mga vendor.
