CEBU – Usa sa nagdala og kadaot sa Southwest Florida ang red tide nga kanunayng naghugaw-hugaw sa mga baybayon nga nagdala usab sa kamatayon sa mga isda uban pang marine life ingon man nakabalda sa mga plano alang sa boating ug pagkaligo.
Gipamatud-an sa usa ka pagtuon nga dili lang ang kalikopan ang angayng basolon sa maong panghitabo gumikan ilahang nakompirmar nga ang kalihokan sa katawhan nakatampo sa padayon ug nagkagrabeng panghitabo sa red tide sa Southwest Florida.
Bisan kun lisod ang pagtino sa hinungdan, importante gihapon kini gumikan nagmugna kini og makadaot nga hilo nga maka-apekto sa katawhan ingon man sa mga kinabuhi ilawm sa dagat ug sa yuta.
Gisumpay sa mga tigdukiduki ang mga panghitabo sa Charlotte Harbour ug sa palibot nga mga dapit sa kabaybayonan ngadto sa nitrogen inputs gikan sa Caloosahatchee River, Lake Okeechobee ug mga dapit sa ibabaw sa linaw.
Sumala ni study co-author Christine Angelini, director sa Center for Coastal Solutions, nga nakompirmar sa ilahang pagtuon nga ang nitrogen loads makahimo sa redtide nga molanat sa dugayng panahon.
Kani nga nitrogen loads naggikan sa pipila ka aktibidad sa katawhan sama nalang sa paggamit og fertilizers (abuno), wastewater ug animal waste.
