Imbistigahan sa House Committee on Justice, diin gipangulohan ni Batangas 2nd District Rep. Gerville Luistro, ang extradition request sa Estados Unidos alang kang Pastor Apollo Quiboloy aron maklaro ang mga isyu sa proseso.
Nasayran nga ang motu proprio nga imbestigasyon gisugdan sa hangyo ni Akbayan Party-list Rep. Perci Cendaña, kinsa nanawagan sa komite ni Luistro nga mohimo og inquiry agi’g tabang sa balaod bahin sa extradition request alang kang Quiboloy.
Ang pormal nga mosyon sa pagpadayon sa imbestigasyon gisang-at ni Committee Vice Chairman, Bukidnon 2nd District Rep. Jonathan Keith Flores.
Giaprobahan ni Luistro ang mosyon human walay pagsupak sa mga sakop. Apan una niini, ang mga magbabalaod nihimo una og makuting diskusyon sa panginahanglan sa imbestigasyon.
Matod niini ang duha ka importanteng balaod nga kinahanglang hisgutan mao ang 1994 extradition treaty tali sa US ug Pilipinas ug PD 1069 o ang Philippine Extradition Law nga gipatuman niadtong 1977.
Dugang pa nga “silent” ang duha ka balaod sa pipila ka importanteng detalye.
Gitumbok usab ni Flores nga ang kasamtangang mga balaod dili klaro kung kinsa ang adunay awtoridad sa pagpili tali sa temporaryo nga pagsurender ug paglangan sa pagsurender sa usa ka tawo nga gi-extradited, butang nga giangkon usab ni Luistro.
Giklaro usab ni Luistro nga incidental lang ang pagkalambigit ni Kingdom of Jesus Christ (KOJC) church founder Quiboloy sa imbestigasyon.
Si Luistro miingon nga ang iyang komite maningkamot sa pagpalig-on sa extradition framework sa nasud, pagsiguro sa pagkamay-tulubagon, ug pagpalig-on sa pasalig sa administrasyon sa pakigtambayayong sa Pilipinas sa ubang mga nasud batok sa seryoso nga mga krimen, samtang nagtahod sa kagawasan sa mga korte.
