Mohatag ang House of Representatives og P3-million kang Carlos Yulo human kini makadaog og gold medal sa floor exercise sa gymnastics nga mao’y unang medalya sa Pilipinas sa Paris Olympics 2024.
Matud pa ni House Committee on Appropriations Chairman Representative Elizaldy Co, kining maong pasidungog mao’y agi’g suporta sa mga nahimo sa mga Filipino ug kabahin usab sa pasalig sa ubos nga hawanan aron mapalambo pa ang abilidad sa mga atleta nga Pinoy sa international sports scene.
Nipadangat usab og mensahe si Presidente Ferdinand Marcos, Jr. nga miabi-abi alang sa 24-anyos nga gymnast.
Sa pagkakaron, wala pa’y final nga listahan sa mga premyo nga madawat ni Yulo apan ania na ang mga insentibo nga gianunsyo na alang sa mga Pinoy nga makalangkat og medalya.
- P10 milyones – Ubos sa Republic Act 10699 o National Athletes and Coaches Benefits and Incentives Act, ang Olympic gold medalists makadawat niining maong kantidad gikan sa Philippine Sports Commission
- Misaad sab ang Megaworld og fully furnished two-bedroom unit sa McKinley Hill nga nagkantidad og P24 milyones
- Lifetime free buffet halin sa Vikings
Posibleng madugangan kini sama sa nadawat ni weightlifting star Hidilyn Diaz nga adunay kinatibuk-ang cash incentive nga kapin sa P50 milyones gawas sa house and lots, condominiums, ug lifetime free flights nunot sa iyang pagdaog og gold medal sa Tokyo Olympics 2020.
