CEBU CITY- Gitumbok nga “suicide” ang rason sa kamatayon sa 33-anyos nga abogada kinsa natagak gikan sa ika-16 nga andana sa building sa sa dalan Bohol Avenue, Cebu Business Park ning dakbayan sa Sugbo niadtong Biyernes sa hapon, Septiyembre 20, 2024.
Sa pakighinabi sa Bombo Newsteam sa hepe sa Mabolo Police Station nga si Police Major Romeo Caacoy, gitino niini nga subay sa imbestigasyon sa mga kapulisan basi sa pamahayag sa mga saksi walay lain tawo kauban ang biktima sa ika-16 nga andana kung diin kini natagak.
Kini ang saysay sa mga tawo nga naglantaw sa ika-17 nga andana sa maong building.
Ang abogada kinsa ang pangalan gipugngan, kay migradwar isip Accountant niadtong tuig 2017 ug sa abogasya niadtong tuig 2020 sa usa ka tanyag ang unibersidad sa Dakbayan sa Sugbo.
Ning kasamtangan, padayun pa gihapon ang imbestigasyon sa mga kapulisan partikular na ang pagkuha ug habig sa mga kabanay niini kung aduna ba kiniy kasaysayan sa mga hulga sa pagkutlo sa kinabuhi.
