Gikataho nga wala pa mibalik sa Pilipinas gikan sa US ang kanhi Kalihim sa Department of Public Works and Highways (DPWH) nga si Manuel Bonoan.
Kini bisan pa sa naunang deklarasyon sa kanhi Secretary nga mobalik siya sa nasud sa Disyembre 17, 2025.
Si Bonoan unang miadto sa US aron mouban sa iyang asawa alang sa usa ka medical procedure.
Sumala sa Tigpamaba sa Bureau of Immigration (BI) nga si Dana Sandoval, si Bonoan wala pa makaagi sa bisan unsang immigration counter sa mga tugpahanan ug pantalan sa nasud.
Sa pagkakaron, si Bonoan wala mag-atubang og bisan unsang kaso apan usa siya sa mga girekomendar sa Independent Commission for Infrastructure nga pasakaan og kaso tungod sa giingong korapsyon sa daghang mga proyekto sa flood control project sa nasud, hilabi na sa dihang siya ang kalihim sa DPWH.
Sa pagkakaron, dili pa klaro kung mobalik ba siya sa Pilipinas, labi na kay ang kanhi Kalihim wala pa modeklarar og balik nga flight.
