Gimandoan sa Court of Appeals (CA) ang pagbuhi sa kanhi model nga si Deniece Cornejo human gipakunhoran ang silot nga gipahamtang kaniya kalabot sa kasong “serious illegal detention” nga gipasaka sa aktor nga si Ferdinand Hipolito—nga mas nailhan isip Vhong Navarro.
Matod ni Atty. Ferdinand Topacio, ang abogado ni Cornejo, ang hapit duha ka tuig nga pagkapriso sa iyang kliyente human siya nakonbikto sa Regional Trial Court giisip na karon nga “time served” o silot nga natuman na.
Gikatahong gitabangan siya sa Public Attorney’s Office ug uban pang mga abogado sa pagproseso sa mga dokumento alang sa iyang paggawas.
Gilauman usab nga mahitabo kini sa sayong bahin sa sunod semana.
Kahinumduman, ang pagkapriso sa maong kanhi model nag-gikan sa pagpangulata nga nasinati ni Navarro sulod sa condominium unit niini, ug giila siya nga usa sa mga responsable sa maong insidente, uban sa iyang mga higala.
