CEBU CITY-Muabot sa kapin 20-M pesos nga gidudahang shabu ang naasakmit sa PDEA-7 sa gipahigayon nga buybust operation sa Deca Homes Phase II Dumlog, Talisay City Cebu.
Giila ang nasikop nga si Marwin Abelgas,27 anyos nga gi-kinonsiderang high value target level 3 ug giingong leader sa giilang Abelgas Drug Group. Nasayran nga si Marwin ang giingong mipuli sa giilang drug lord sa Cebu nga si Jeffrey Jaguar Diaz ug si Marwin pa ang giingong nagsuply og shabu sa Central Visayas.
Kauban nga nasikop sa maong operasyon ang live-in partner ni Marwin nga si Kate Estera, 23 anyos ug ang lain pang 3 nga mga kauban niini.
Sa pakighinabi sa Bombo Radyo Cebu kang PDEA-7 Dir. Yogi Felimon Ruiz, giingong niya nga dugay na niyang nabatian ang pangalan ni Marwin sukad pa niadtong bago pa siya nadestino sa Cebu ug kapin sa usa ka buwan na usab nga gisuwayan nila nga makigtransakyon niini. Dugang pa ni Ruiz nga sa ilang surveillance, nasayran nga makadispose si Abelgas og 5 ka kilong shabu sulod sa usa ka semana.
Nakuha gikan sa mga nasikop ang usa ka heat sealed transparent plastic pack nga gitoohang shabu nga may gibug-aton nga 100 grams, lain pang 10 heat sealed transparent plastic pack nga may gibug-aton nga 5 000 grams ug uban pang 3 ka heat sealed transparent plastic pack nga gitoohang shabu nga sa kinatibuk-an mibalor ug kapin 20,400,900 pesos.
Samtang gihimakak ni Marwin ang alegasyon kaniya ug iyang gihimug-atan nga natulog lang siya sa iyang balay sa dihang kalit nga miabot ang PDEA ug wala siya masayod diin gikan ang giingong shabu nga nakuha gikan kaniya. Apan karon padayon nga gi-interrogate sa PDEA-7 si Abelgas sa pagsuta kung diin gikan ang supply niini sa gitoohang shabu.
Mag-atubang sa kaso nga pagyuhot sa iligal nga droga si Ablegas hasta na ang iyang ka live in partner ug 3 pang kauban niini.
