Pormal nang gi-ablihan gahapong adlawa ang International Media Center (IMC) alang sa tanang rehistradong media ug mga delegado isip pagpangandam alang sa ika-48 nga ASEAN Summit ug lain pang kalihokan nga adunay kalambigitan niini, diin gipahigayon kini mismo sa
Mactan World Museum sa Lapu-Lapu City, Cebu.
Ang International Media Center (IMC) mao ang magsilbing sentro alang sa lokal ug internasyonal nga media, nga maghatag og mga pasilidad ug suporta aron masiguro ang tukma ug komprehensibo nga pagbalita sa mga kalihokan maykalabotan sa ASEAN.
Ingun man nga nagpakita ang pormal nga pag-abli niini sa kaandam sa Pilipinas isip ASEAN Chair aron suportahan ang mga operasyon sa media ug ipakaylap ang mga importanteng impormasyon kabahin sa summit.
Lakip sa mga highlight sa programa ang mga mensahe gikan ni Cebu Governor Pamela Baricuatro ug Lapu-Lapu City Mayor Cynthia Chan, ug ingon man usa ka press briefing gikan sa mga nag-unang opisyales.
Atol sa briefing, si Presidential Communications Office Secretary Dave Gomez, nihatag og gibug-aton sa kaandam sa Pilipinas isip ASEAN Chair, ilabi na sa pagbaton og hingpit nga operasyon ug andam nga International Media Center.
Samtang, gihangop usab ni Cebu Governor Baricuatro ang mga sakop sa tigbalita diin nagpasalamat kini nga ang local nga media sa Sugbo, lakip na ang Bombo Radyo Cebu, mao ang mamahimong dagway ug representante sa nasud nga Pilipinas alang sa pagpadayag sa husto ug tukman impormasyon nga ipakaylap kabahin sa dakong kalihokan.
