CENTRAL VISAYAS-Nakatala ang Police Regional Office-Central Visayas og kapin sa 62,000 ka mga indibidwal nga nasikop sulod sa miaging duha ka tuig.
Gikan sa Hunyo 30, 2022 o sukad sa paglingkod ni Presidente Ferdinand “Bongbong” Marcos Jr. hangtod sa Hulyo 31 ning tuiga, ang PRO-7 nakadakop og 62,347 ka mga suspek sa krimen isip kabahin sa anti-criminality campaign niini.
Gikanayon sa buhatan sa PRO-7 nga sulod sa duha ka tuig, niabot sa 14,033 ka anti-illegal drug operations ang gipahigayon nga nisangpot sa pagkasikop sa 17,059 ka mga drug personalities.
Nasakmit usab sa nagkadaiyang police units sa rehiyon ang 369,698.90 gramos nga shabu ug 270,956.42 gramos nga adunay hiniusang kantidad nga P2,546,959,490.40.
Matud ni Brig. Gen. Anthony Aberin nga sukad sa iyang paglingkod isip hepe sa PRO-7, nasakmit ang ilegal nga drugas nga mobalor og P1,205,535,448.98 ang naguba uban sa koordinasyon sa Philippine Drug Enforcement Agency-Central Visayas.
Sa kampanya batok sa ilegal nga sugal, 14,643 ka mga operasyon ang nahimo nga nisangpot sa pagkasikop sa 27,651 ka mga tawo ug nasakmit ang P3,372,408.55 nga kwarta.
Samtang ang kampanya batok sa loose firearms misangpot usab sa pagkasakmit sa 11,244 ka nagkalain-laing armas ug pagkasikop sa 1,973 ka mga indibidwal.
Ug sa kinatibuk-an nga 15,664 ka mga wanted persons ang gidakop usab sa miaging duha ka tuig, 2,206 kanila ang gikonsiderar nga “most wanted persons.”
Gipaambit usab ni Aberin nga ang PRO-7 nagpakusog sa kampanya batok sa tanang matang sa kriminalidad pinaagi sa pagpahigayon og tulo ka regional-wide simultaneous anti-criminality operations.
Diin sa walay hunong nga kampanya batok sa ilegal nga drugas, 71 porsiyento sa tibuok barangay sa Rehiyon 7 ang nadeklarar nga drug cleared.
Matod ni Aberin nga target sa PRO-7 nga sa katapusan ning tuiga, 3,003 ka barangay, apil na ang mga grabeng apektado sa ilegal nga drugas, ang madeklarar nga drug-cleared.
