CEBU CITY-Malampuson nga nadakpan sa City Intelligence Unit sa Cebu City Police Office ang usa ka high value individual diin nakuhaan og 1,055 gramos sa gituohang shabu, nga mobalor og P7,174,000, atol sa buy-bust operation sa Nicholas Heights sa Brgy. Guadalupe, dakbayan sa Sugbo.
Giila sa mga kapulisan ang suspek nga si Christian Dave Canoy o mas nailhan nga “Boshook,” 22-anyos.
Matud ni Cebu City Police Office Director Police Col. Ireneo Dalogdog nga ang source ni Canoy sa iligal nga drugas gikan sa usa ka ilado nga drug personality nga anaa karon sa Cebu City Jail.
Dugang pa niini nga ang maong suspek maka-dispose og shabu sa dili moubos nga 500 hangtud sa 1000 gramos matag semana.
Asoy sa opisyal nga milungtad og 3 ka semana nga gipaubos og surveillance ang maong suspetsado sa wala pa kini gidakop.
Gani, pahimangno ni Dalogdog sa katawhan nga magmatngon ug kung adunay mga namatikdan nga adunay kalambigitan sa iligal nga drogas, ipaabot kini sa buhatan sa kapulisan sa Sugbo arun mahatagan og aksyon ug ingon man makunhuran ang maong iligal nga kalihokan.
