PROVINCE OF CEBU-Gilantawan sa kagamhanang lalawigan sa Sugbo ang pagtukod sa usa ka “standards for cleanliness” para sa tanan nga mga nag-operate nga mga resort sa tibuok lalawigan.
Gi-anunsyo kini ni Cebu Provincial Governor Gwendolyn Garcia atol sa usa ka meeting niini sa mga resort operators sa Sugbo ngadto sa Kapitolyo niadtong adlaw sa Sabado, Nobyembre 16, 2024.
Ang maong panagtagbo kay usa ka preparasyon para sa umaabot Suroy-Suroy sa Sugbo Southern Heritage Trail nga magsugod sa Nobyembre 22 hangtod 24.
Gitambongan kini nila Board Member Red Duterte, ang chairman sa Provincial Board Committee on Tourism ug ni Provincial Tourism Officer Marti Ybañez.
Aron mahimo ang inisyatiba, ang gobernador mohangyo sa Provincial Board nga mopasar og ordinansa nga maglangkob niini nga polisiya.
Isip kabahin sa proseso sa assessment sa Suroy-Suroy Sugbo, ang mga bisita hangyoon sa pag-rate sa ilang mga akomodasyon.
Ang mga rating maghatag ug bililhong feedback aron mahibal-an kung unsang mga establisemento ang makahimo sa pagtagbo sa gitinguha nga mga sumbanan ug kung diin kinahanglan nga pauswagon.
Samtang ang kadaghanan sa mga nanambong kay gi-book para sa umaabot nga Suroy-Suroy, gidasig ni Gobernador Gwen ang ubang mga tag-iya sa resort nga himoon ang ilang mga pasilidad nga magamit alang sa umaabot nga mga turismo nga mga caravan ug pagtanyag sa mga bisita og mga kapilian, ilabi na kadtong adunay maayo nga rating sa mga dagkong online booking platform.
