Gipahibalo ni PNP Chief, Police General Rommel Francisco D. Marbil, nga ang Philippine National Police malampuson nga naapod-apod ang Mid-Year Bonus sa kinatibuk-ang 230,925 ka mga uniformed ug non-uniformed personnel, karung adlawa Mayo 15, 2025.
Kung diin, ang pondo nga gigahin sa Department of Budget and Management alang niini nga katuyoan niabot sa ₱7,726,103,239, ug direkta nga gi-kredito sa Landbank ATM payroll accounts sa mga kwalipikado nga nakadawat.
Ang Mid-Year Bonus susama sa usa ka bulan nga batakang suweldo ug gihatag sa mga kawani nga nakaserbisyo labing menos upat ka bulan gikan sa Hulyo 1 sa miaging tuig hangtod Mayo 15 sa karon nga tuig, ug aktibo gihapon nga nagserbisyo sa mao nga petsa.
Sakup niini ang mga pulis, kadete, ug Non-Uniformed Personnel sa organisasyon.
Samtang, ang mga personahe nga nag-atubang og administratibo o kriminal nga mga kaso nga wala pa masulbad angayan gihapon nga makadawat sa Mid-Year Bonus, gawas kung sila mapamatud-an nga sad-an pinaagi sa final ug executory nga hukom.
Kung adunay katapusan nga sad-an nga hukom, dili na sila makadawat sa Mid-Year Bonus alang nianang tuiga ug kinahanglan ibalik ang kantidad nga ilang nadawat. Apan kon badlong lang o reprimand ang silot nga ipahamtang, ang maong mga personnel magpabiling takos sa bonus.
