CEBU – Giila sa kapolisan sa dakbayan sa Carcar ang lalaki, kinsa gipusil-patay niadtong Sabado sa gabii, Nobiyembre 5, sa Sitio Nangkaan, Barangay Perrelos sa nahisgutang siyudad.
Kung diin si Police Lieutenant Colonel Ardioleto Cabagnot, hepe sa Carcar City Police Station, niila sa biktima nga si Brian Pedrano, 45-anyos nga seaman ug lumad nga taga Palompon sa probinsiya sa Leyte.
Matod ni Cabagnot nga ilang naila ang biktima gikan sa ticket sa bangka nga ilang nakuha sa iyang posesyon.
Nakahigayon usab sila sa pagkontak sa iyang pamilya human ilang nakit-an ang Facebook account sa usa sa iyang mga kabanay nga ilang gihangyo nga i-verify ang pagkatawo ni Pedrano ug mahatagan og mga dokumento ug mga litrato niini.
Hinuon di pa nila masuta kon unsay hinungdan sa iyang pagpatay ug nganong didto siya sa Sitio Nangkaan Sabado sa gabii.
Dugang pa, nga nakig-alayon sila karon sa igsuon ni Pedrano, nga nagpuyo sa lungsod sa Consolacion sa amihanang Sugbo, aron makakuha og dugang impormasyon sa ilang biktima sanglit naglaum usab sila nga masuta ang posibleng motibo sa pagpatay niini.
Base sa ilang inisyal nga imbestigasyon ug sa asoy sa mga residente sa dapit, ang biktima nakit-an nga nakig-estorya sa laing tawo sa dili kaayo suga nga lugar sa Sitio Nangkaan sa wala pa kini gipusil patay.
Nakit-an sa kapolisan ang usa ka samad sa bala sa likod nga bahin sa liog ni Pedrano ug laing duha sa iyang dughan, pulos gikan sa kalibre .45.
