CEBU – Anaa sa full alert status ang tanang polis sa Central Visayas sugod karong Disyembre 15, 2022, alang sa holiday season.
Kini ang gipahibalo ni Police Brigadier General Roderick Augustus Alba, direktor sa Police Regional Office sa Central Visayas (PRO-7) nga aduna silay igong personnel nga ipakatap sa mga dapit nga convergence sama sa mga pantalan ug terminal aron masiguro nga ma-maximize ang ilang presensya aron makab-ot ang usa ka malinawon ug hapsay ang Pasko ug Bag-ong Tuig.
Sa pagkakaron, aduna nay 11,600 ka mga polis ang PRO-7 sa tibuok rehiyon.
Dugang pa ni Alba nga magbutang usab sila og police assistance desk sa mga terminal ug uban pang mga dapit sa convergence nga daling mapangayoan og tabang sa publiko sa panahon nga gikinahanglan.
Ang tibuok grupo sa kapulisan sa Central Visayas nagtinguha nga ma-zero ang krimen karong panahon sa kapaskuhan.
Samtang gihuman nila ang ilang safety measures, gihingusgan usab sa kapolisan ang ilang anti-criminality operations alang sa malinawon nga holiday season.
