CEBU CITY-Gibasura sa Office of the Ombudsman ang laing kasong administratibo batok kang Cebu City Mayor Raymond Alvin Garcia ug uban pang opisyales sa kagamhanang dakbayan sa Sugbo.
Sumala sa usa ka dokumento gikan sa buhatan sa Ombudsman nga nagpakita kini og evaluator’s report nga giisyu niadtong Enero 10, 2025 nga nagdismiss sa mga kasong giduso sa usa ka wala nagpailang indibidwal batok kang Mayor Garcia, Department of Interior and Local Government Central Visayas Regional Director Leocadio Trovela, kanhi Cebu City Police Office City Director P/Col. Antonietto Canete, ug City Legal Office Head Santiago Ortiz Jr. sa giingong “outright lack of palpable merit.”
Ang maong reklamo nag-ingon si Mayor Garcia kay mi-asumir sa katungdanan isip Mayor sa dakbayan sa Sugbo nga walay merito sa awtoridad tungod kay naka-ong-ong pa ang desisyon sa Ombudsman batok kang Dismissed Cebu City Mayor Michael Rama niadtong 2024 sa kasong nepotismo ug grave misconduct.
Matod sa maong report kay ang maong wala nagpailang reklamante kay napakyas pagsumiter sa mga gikinahanglang ebidensya nga magsupporta sa mga alegasyon sa mga sinumbong.
Dugang pa nga nanukad ra ang argumento sa reklamante sa mga higon-higon nga hinungdan sa kakuwang sa merito.
Sa samang bahin, gibasura sab niini ang argumento ngadto kang kanhi Office of the Senior Citizens Affairs head Homer Cabaral human gihulipan kini kay co-terminus kini ni Rama sa katungdanan.
Kahinumduman ga gipulihan ni Garcia si Rama human sa usa ka tuig nga suspension niini sa kapakyas sa pagpangsweldo sa mga trabahante sa City Assessors Office ug ang dayong dismissal niini tungod sa kasong nepotismo.
