CEBU CITY-Mipasalig si Deputy Director for Operations, Police Lieutenant Janet Rafter sa publiko nga ang Cebu City Police Office, nga gipalig-onan niini ang mga lakang sa seguridad batok sa posibleng mga kaso sa ‘akyat bahay’ atol sa pagsaulog sa Semana Santa.
Gitataw ni Rafter nga posibleng motumaw ang mga kaso sa ‘akyat bahay’ o tulis gumikan ang mga tawo mopaingon sa ilang tagsa-tagsa ka probinsiya atol sa naasoy nga kalihokan.
Hinungdan nga nakig-alayon ang mga sakop sa kapulisan sa Sugbo sa Barangay Public Safety Officers o kon BPSO ug force multipliers aron masiguro ang kaluwasan ug seguridad sa dakbayan.
Gihatagan usab ug gibug-aton ni Rafter ang pagdoble sa mga lakang sa seguridad ug pagsiguro nga nakandado ang mga tagsa-tagsa ka mga panimalay aron malikayan nga makawatan.
Gipahinumdoman niini ang publiko nga mag-obserbar sa mga safety measures sa dili pa mogawas sa ilang mga panimalay sama sa pagsiguro sa pagtangtang sa mga electric appliances ug pagpalong sa mga gas stoves aron malikayan ang mga sunog.
