Misang-at og kasong obstruction of justice ang Philippine National Police-Criminal Investigation and Detection Group (PNP-CIDG) batok kang Senador Robin Padilla ug uban pang mga indibidwal tungod sa giingong pagtabang sa pag-ikyas ni Senador Ronald “Bato” Dela Rosa.
Gikumpirmar ni Prosecutor General Richard Fadullon nga ang reklamo gisang-at sa Department of Justice (DOJ) sa wala pa ang alas 5 sa hapon niadtong Huwebes.
Ingon man nga ang CIDG sa sayo pa nagpahibalo niadtong Miyerkules nga nagplano kini nga magpasaka og kaso batok kang Padilla ug uban pang mga personalidad tungod sa giingong pagtabang kang Dela Rosa sa paglikay sa mga awtoridad.
Apan, hugot nga gihimakak ni Padilla ang pasangil, ug sumala sa senador, wala niya gitabangan si Dela Rosa nga makaikyas apan gipasakay lang niya kini sa iyang sakyanan pagawas sa Senado sa sayong mga oras sa Mayo 14 human siya giingong miuban kaniya.
Samtang, ang CIDG miingon nga ang insidente sa pagpamusil sa Senado ug ang giingong pag-ikyas ni Dela Rosa adunay kalambigitan.
Si Dela Rosa nag-atubang og warrant of arrest tungod sa giingong indirect co-perpetrator sa usa ka kaso sa krimen batok sa katawhan nga may kalabutan sa sunod-sunod nga pagpatay gikan sa Hulyo 3, 2016 hangtod Abril 2018, diin labing menos 32 ka tawo ang namatay.
Mahinumduman nga ang mga awtoridad misulay sa pag-serve sa warrant batok kang Dela Rosa niadtong Mayo 11, nga miresulta sa usa ka paggukod sulod sa Senado. Sa ulahi gibutang siya sa protective custody sa Senado sa wala pa giingong mibiya sa building niadtong Mayo 14.
Gimandoan usab ni Justice Secretary Fredderick Vida ang mga ahensya sa pagpatuman sa balaod nga pangitaon ug dakpon si Dela Rosa, kinsa iyang gitawag nga “pugante gikan sa hustisya.” Giawhag usab niya ang senador nga boluntaryong mosurender sa mga awtoridad.
