CEBU CITY-Gikatahong nisaka og 50% ang kaso sa rabies sa dakbayan sa Sugbo karong tuiga kon itandi kini sa miaging tuig 2023.
Giklaro sa kadagkuan sa Department of Veterinary Medicine and Fisheries nga kini tungod sa ubos nga anti-rabies vaccination rate sa mga iro ug iring sa dakbayan.
Matud ni Dr. Alice Utlang nga nakatala na sila og 13 ka kaso ning buwan sa Hulyo.
Dugang pa niini nga ang hinungdan sa maong pagsaka sa kaso tungod kay wala nila nakab-ot ang 80 porsyento nga mabakunahan ang mga binuhing mananap.
Basi usab sa datus sa buhatan sa DVMF nga ang Barangay Lahug ang adunay pinakataas nga natala sa maong kaso nga adunay 4 ka kaso ug ang ubang barangay anaa lang sa tag-usa ka kaso.
Subay niini, mas gipalapdan nila ang mga programa arun sa pakigbatok sa rabies ug pag-awhag sa mga responsible pet ownership.
Ingon man ang pagpahigayon og mga training sa mga vaccinators.
Gipahingusgan usab sa buhatan ang pagduso sa citation tickets sa pagpahamtang niini sa mga iresponsableng tag-iya sa mga binuhi ug magdependi ang penalty fee sa malapas niini.
