Cebu City-Pasakaan og kasong kalapasan sa Republic Act 9147 o “Conservation and Protection of Wildlife Resources and their Habitats Act” ang 5 ka tao nga nasikop tungod sa pagpamaligya og karne sa green turtle o pawikan.
Una niini, nasikop sa entrapment nga gipahigayon sa Department of Environment and Natural Resources (DENR), National Bureau of Investigation (NBI) ug Cebu City Prevention Restoration Order Beautification Enhancement (PROBE) ang 5 ka tao kung diin narekober ang 94.5 kilong mga karne sa pawikan para himoong “pawikan stew” o giila sa tawag nga “pawikan larang”.
Sa paghiling usab sa Cebu City Department of Veterinary Medicine and Fisheries, 6 ka ulo sa pawikan nga gitadtad ang ilang nakumpiskar 2 niini ang naa na sa saktong edad, 2 ang bata pa, usa ka semi-adult ug usa ka yearling.
Matud ni DENR 7 Regional Executive Director Gilbert C. Gonzales nga hugot nga gidili ang pagpanguha sa mga wildlife species nga walay permit ug mamahimo kining mapriso sulod sa 4 hangtud sa 6 ka tuig ug pamuultahon usab og 50,000 hangtud 500,000 pesos.
Dugang pa ni Gonzales nga ang mga green turtle o pawikan gikonsiderar na nga endangered ug naghinay-hinay og kahurot hayan kinahanglan matud pa kining protektaran.
Gi-awhag usab niini ang publiko nga dili na mukaon ug maupalit sa maong karne ug pagpalit niini para maundan na usab ang pagbaligya.
Nasayran nga gibaligya ang karne sa pawikan sa Cebu sa kantidad nga 200 pesos per kilo samtang ang “pawikan stew” o larang usab muabot sa 90 pesos per serving.
