Gikumpirmar ni Sawang Calero Brgy. Captain Sergio Ocaña nga mitaliwan si Konsehal Ramon Diamante, 62 anyos, kaganihang buntag tungod sa iyang mga nahiagom nga samad pinusilan human gibanhigan sa riding in tandem pasado alas 4:20 sa kadlawn didto sa Genes St. Brgy Sawang Calero, Cebu City.
Matod pa, gawas nga usa ka konsehal sa Sawang Calero, si Diamante adunay gipanag-iyang luna usab sa Pasil Fish Port, ug basi sa gikabutyag sa Kapitan, si Diamante padulong pa sa Pasil ug naglakaw sa General Genes Street, kung diin didto siya napulisan sa wala pa mailhing personahe nga nagsakay sa motor nga Yamaha Mio color yellow.
Sa pagkakaron, ang sakop sa Kapulisan sa Sawang Calero Police Station nagpadayon pa ang ilahang back tracking sa maong area kung diin nahitabo ang pagpamusil.
Subay usab sa pagpanukiduki sa sakop sa Bombo Radyo Cebu Newsteam, personal nga nahinabi niini si Sawang Calero Brgy. Capt. Sergio Ocaña, ug iyang giasoy nga wala siyay namatyagan nga adunay gikalambigitan kining kagubot ang maong konsehal, o maskin ba kaha motibo nga nakasumpaki niini, o bisan kaaway sa negosyo, hinungdan nga nakuratan sila sa panghitabo.
Apan,aduna usa ka insidente nga natino ni Kapitan Ocaña kadtong milabay nga pasko, Disyembre 25, 2025, adunay pinusilay usab nga nahitabo sa maong barangay.
Diin, sa maong shooting incident sa manag half-brother, gipusil sa ilahang uyuan nga nailang si Eric Espena kinsa kasamtangang nabilanggo na, samtang ang pagumangkon niining naila sa “Alyas Budoy Espena” at largre pa kini o nagpabiling gawasnon, hinungdan nga mao kini ang gitumbok nga Person of Interest (POI).
Kay matod pa sa gikabutyag ni Kapitan Ocaña, ang pamilya ni “Alyas Budoy Espena” gihangyo kaniadto ni Konsehal Diamante nga pa surrender-ron na siya.
Subay niini, adunay hangyo ug panawagan si Kapitan Ocaña ngadto kang “Alyas Budoy Espena.”
Sa karon, nagpadayon pa ang imbestigasyon aron mailhan ug madakpan ang suspek nga nipusil sa biktima, ingon man ang motibo sa maong krimen, kay dali man nga nangsibat ang mga suspek human sa ilahang katuyoan nga pusilon ang maong konsehal.
