Cebu City- Blangko pa ang Liloan PNP kabahin sa identity sa mga suspek nga mibanhig patay kang Brgy Ermita Kapitan Felicisimo “Imok” Rupinta sa Sitio Simburyo, Barangay Tayud, Lungsod sa Liloan, Probinsya sa Sugbo. Pasado alas otso kagabie sa dihang pauli na unta sa ilang balay sa Brgy Tayud , Liloan si Kapitan Imok kauban ang ka live-in niini nga si Jocelyn Mendoza sakay sa ilang pick up truck sa dihang gibanhigan sila sa 4 ka mga suspek sakay sa motorsiklo.
Matud ni SPO2 Andrew Rellanos, ang imbestigador sa Liloan Police Station nga basi sa nakuha nila nga impormasyon sa ka live in sa kapitan nga nakit-an na nila daan nga dunay duha ka motorsiklo nga nag sige ug sunud kanila. Nakaangkon ug samad pinusilan sa iyahang ulo ug abaga ang kapitan samtang samad sa abag usab ang naangkon ni Mendoza. Gisulayan pa sa pagdala sa pinakaduol nga tambalanan si Rupinta apan gideklarar kini nga dead on arrival.
Nasayran nga si Kapitan Rupinta ang kauban ang tibuok barangay officials sa Brgy Ermita ang gisuspenso sa 6 ka buwan human wala makigkooperar sa gipahigayong anti drug operation sa Philipine Drug Enforcement agency 7. Sa pagbalik niini sa serbisyo, gilusad niini ang shame campaign sa ilahang barangay.
Samtang sa milabayng buwan nahimo usab kining kontrobersyal gumikan sa pag demolish niini sa pipila ka mga manindahay sa Carbon Public Market ingon man usab ang pagpaningil niini ug 10 pesos sa mga vendors nga gisupk usab sa Cebu City Government.
