LILOAN,CEBU- Nakakuha og proyekto ang mga Discaya alang sa pagtukod sa drainage ug flood control structures daplin sa Cotcot River sa lungsod sa Liloan, Sugbo.
Ang maong proyekto nagkantidad og P149.5 milyon ug gi-award sa Department of Public Works and Highways (DPWH) ubos sa Contract ID No. 24H00016, nga kabahin sa Flood Management Program sa ahensya.
Gipirmahan ang kontrata kaniadtong Abril 1, 2024, ug gitugotan ang joint venture nga Alpha & Omega Gen. Contractor & Development Corp./MC Geometric Proportions, Inc. (JV), nga girepresentahan sa mga Discaya, sa pagkumpleto sa trabaho sulod sa 330 ka adlaw, lakip na ang 35 ka adlaw nga giila nga unworkable days.
Kung diin, anaa sa kasabutan ang pagtukod ug pagmentinar sa mga flood mitigation structures, drainage facilities, ug mga protective works nga mosubay sa Cotcot River, aron malikayan ang regular nga pagbaha sa lugar.
Gibanabana sa P72 milyon ang kantidad alang lamang sa structural steel sheet piles, samtang dako usab ang alokasyon para sa structural concrete ug rubble concrete.
Wala pa nagpagawas og pahayag si Cebu Fifth District Rep. Vincent “Duke” Frasco, bisan pa nga ang proyekto nahimutang sa iyang distrito.
Nailhan usab ang ngalan sa mga Discaya sa bag-ohay nga Senate Blue Ribbon Committee hearing, diin gipatawag sila aron ipasabut ang ilang kalambigitan sa giingong mga iregularidad sa ubang flood control projects.
