PROVINCE OF BOHOL-Dili accredited sa Department of Tourism ang trending karon sa Captain’s Peak Resort tungod sa nahimutangan niini sa tunga-tunga sa Chocolate Hills sa Bohol.
Kini maoy gipasiugda sa Tourism Department nunot sa negatibong reaksyon sa publiko ug bisan sa mga magbabalaod sa maong kontrobersyal nga resort karon.
Sa usa ka pamahayag, ang DOT namahayag nga ang maong resort dili sakop sa accreditation system sa ahensya, ug wala kini pending nga aplikasyon uban kanila.
Dugang pa niini, gipahibawo usab sa ahensya nga sukad niadtong Agosto sa miaging tuig nakig-alayon na kini sa kagamhanang probinsyal sa Bohol tungod sa ilang kabalaka kalabot sa nasangpit nga isyu, partikular na sa pag-ila sa kamahinungdanon sa pagpreserbar sa integridad sa natural resources sa Chocolate.
Kung kahinumdoman, una nang gibutyag sa Department of Environment and Natural Resources sa managlahing pamahayag nga niadto pang Septiyembre 2023 naka-issue na kini og temporary closure order batok sa maong resort, samtang niadtong Enero 22, 2024 nipagawas na usab og Notice of Violation ang ahensya batok niini tungod sa pag-operate nga wala ang katugbang nga Environmental Compliance Certificate.
