PROVINCE OF CEBU- Mikunhod og 47 porsyento ang mga kaso sa kapintasan batok sa kababayen-an sa probinsiya sa Sugbo, sumala sa Cebu Police Provincial Office.
Gikan sa 259 ka mga kaso sa Enero–Pebrero 2025, miubos kini ngadto sa 137 sa samang panahon karong tuiga.
Lakip sa datos ang mga kasong naglambigit sa kababayen-an nga mikunhod usab gikan sa 133 ngadto sa 86, nga naglangkob sa mga kalapasan sama sa Anti-VAWC Act, mga buhat sa kalaw-ayan, pagpanglugos, concubinage, ug ang Safe Spaces Act.
Matod ni Police Lt. Ritchil Tesoro, hepe sa CPPO Women and Children’s Protection Desk, ang pagkunhod tungod sa gipakusog nga mga paningkamot sa pagpugong, lakip ang pagbisita sa balay-balay ug mga dayalogo sa komunidad.
Bisan pa sa maong pagkunhod, giingon ni Tesoro nga daghang mga biktima, ilabi na kadtong giabusohan sa ilang mga kapikas ang nagpabiling hilom tungod sa kahadlok sa pagpanimalos, panagbangi sa pamilya, o pagkawala sa pinansyal nga suporta.
Gihatagan og gibug-aton ni Tesoro nga dako og tabang ang programang “Pulis sa Panimalay,” kung diin ang mga pulis sa matag estasyon mobisita sa labing menos 10 ka panimalay kada adlaw aron ipang-apod-apod ang impormasyon bahin sa legal nga sangputanan, pagbantay sa komunidad, ug sayo nga pagreport.
Gisuportahan kini sa inisyatibong “Pito Laban sa Abuso,” diin gihatagan og mga sipol o whistles ang mga residente aron magsenyas og peligro ug mangayo og tabang.
