CEBU CITY — Mihulga si Mayor Edgardo Labella nga pasirad-an ang KTV bar sa may Gen. Maxilom Avenue kung mapamatud-an nga nambugaw og mga menor de edad.
Kini subay na sa pagka-rescue sa 11 ka mga menor de edad niadtong nakalabay nga weekend nga giingong gibugaw sa mga dinakpan ang mga biktima sulod sa KTV bar.
Matud ni Labella nga gitahasan niini si Atty. Rey Gealon, ang city legal officer, nga ipaubos sa imbestigasyon ang pagka-rescue sa mga menor de edad kinsang giingong gibugaw.
“By all means they should be punished. I will have that investigated by the City Attorney. If found that there is a liability on the part of the KTV, then I will issue a cease and desist order,” sigon pa ni Labella.
Kahinumduman nga niadtong Sabado, Agosto 17 sa gabii, gisikop sa mga sakop sa Cebu City Police Office ang tulo ka giingong mga bugaw ug ubay-ubay nga mga babaye ang naluwas sa maong operasyon.
Una niini, naalarma ang City Police Director nga si Colonel Gemma Vinluan gumikay kay, matud pa, nadala ang mga kabatan-onan sa hiwi nga dalan tungod sa sexual exploitation.
Nasayran nga gibugaw sa mga dinakpan ang mga na-rescue, lakip na ang mga menor de edad, bugti sa kantidad nga P1,000 ngadto sa P3,000. (with reports by Bombo Jun Salde/GN)
