MOPAHIGAYON og surprise visit si Cebu City Mayor Edgardo Labella sa Operation Second Chance aron personal niyang makita kung gi-unsa ba pag-atiman sa mga house parents ang mga menor de edad sa pasilidad.
Matud ni Labella nga iyang taymingon ang pagbisita panahon sa tingkaon aron makita kung sakto ba ang gipangkaon sa mga “children in conflict with the law” ug wala ba sila gimaltrato.
Dugang pa ni Labella nga kinanahanglang madakpan pagbalik ang mga lain pang pito ka mga menor de edad human sila nakaeskapo sa nakalabay nga semana.
Mibahad usab ang mayor nga mag-atubang og responsibilidad ang mga ginikanan o custodian kun ugaling gitaguan nila ang ilang anak nga lakip sa mga naka-eskapo sa Operation Second Chance.
Nasayran nga 22 ka mga menor de edad, kinsa nga nalambigit sa mga ilegalidad, ang naka-ikyas sa maong pasilidad apan nadakpan ug misurender sa otoridad ang pipila ka nila samtang nagpabiling gawasnon ang pito ka mga menor de edad. (with reports by Bombo Jun Salde/GN)
