Mukabat sa 150 ka mga balay ang naugdaw ug 450,000 pesos ang natalang danyos sa pag-ulbo sa sunog sa Almers Compound Brgy. Tabok dakbayan sa Mandaue kagahapon sa hapon.
Matud ni SFO1 Wendell Villanueva ang radio operator sa BFP, Mandaue nga nadawat nila ang alarma pasado ala una sa hapon apan gumikan sa kalispod sa dalan ug sa daling pagkatap sa kayo tungod kay mga light materials lang ang mga balay, gisaka ang alarm sa task force alpha pasado alas 4 sa hapon.
Gitoohan nga electrical fault wiring ang hinungdan sa maong sunog apan padayon pa kini karong giimbestigaran.
Wala hinooy natalang naangol o namatay sa maong sunog.
Samtang dali usab nga napahimutang ang mga fire victims sa multi-purpose building sa naasoy nga barangay.
Kini ang gibutyag usab ni Brgy. Tabok Kapitan Dario Tariman kinsang miresponde usab dayon pagkahitabo sa sunog.
Sigon sa kapitan nga priority usab nila ang pagpahimutang sa mga nasunogan, ang ilang pagkaon ug ang pag-ihap kung pila gyud ang mga nasunugan.
