NALIGO sa kaugalingong dugo ang usa ka lalaki human gipusil-patay sulod sa iyang SUV sa may Juan Luna Avenue extension, sa Brgy. Mabolo, dakbayan sa Sugbo.
Giila ang biktima nga si Jeffrey Gumonit, 49 anyos, ug residente sa Brgy. Looc, sa dakbayan sa Mandaue.
Matud ni Police Lieutenant Pablito Saldo, ang deputy chief sa Mabolo Police Station, nga girespondehan nila dayon ang maong insidente duol sa ilang buhatan human nga midangop ang usa ka concerned citizen.
(I-click kining link alang sa video report.)
Base sa inisyal nga imbestigasyon, nga samtang naghuwat ang biktima nga mo-green ang traffic light aron makalarga, mihunong ang riding-in-tandem sa iyang tungod diin naka-mask kini ug naka-black jacket.
Hangtud nga gibunlot sa backrider ang iyang armas dayon og pusil ngadto ni Gumonit.
Narekober sa SOCO team ang tulo ka empty shells ug usa ka buhing bala sa wala matino nga armas.
Nakahiagum og samad-pinusilan si Gumonit sa iyang ulo ug dughan.
Dugang pa ni Saldo nga wala pa silay motibo sa maong pagpamusil ug ilang subayon ang CCTV cameras nga nagpalibot alang sa ilang imbestigasyon.
Kahinumduman nga gibahigan-patay ang police officer nga si Police Captain Delfin Bontuyan sa wala matino nga gunmen sa susamang dapit niadtong Mayo 21 ning kasamtangang tuig.
(Read more: Kanhi CIDG 7 Senior Investigator, gipusil patay)
