CEBU CITY-Nadayunan sa iyahang pagkatulug ang usa ka lalaki human kini gipusil sa duha ka mga wala mailhing mamumuno sulud mismo sa ilahang panimalay sa Sitio Humayan, Barangay Pangdan, dakbayan sa Naga, probinsiya sa Sugbo.
Giila ang biktima nga si Julius Cesar Aliganga, 22 anyus, ug residente sa nahisgutang dapit.
Gisaysay ni Police Staff Sergeant (PSSg) Nikki Plarisan sa Naga Police Station nga natulog ang biktima sa dihang gisulud kini sa duha ka mga lalaki ug dayung gipusil.
Matud pa nga aduna pa’y laing tulu ka mga kauban ang duha ka mamumuno kinsang anaa sa gawas sa panimalay sa biktima nga nagpaabut ug nagsilbi nga lookout.
Dugang pa ni PSSg Plarisan nga walay kauban ang biktima sa ilahang panimalay sa dihang nahitabu ang krimen.
Gilantaw sa kapulisan ang personal nga panagbangi ug iligal nga drugas ang motibo sa maong krimen gumikan kay sa nasayran giingung nagduwa ug shabu ang biktima. (SBR)
