Natanggong sa prisuhan ang usa ka lalaki kinsang giingong nanunggab sa iyang kauban gumikan kay wala kini nakigatagay kaniya sa Brgy. Poblacion, lungsod sa Barili, Cebu.
Giila ang dinakpan nga si Alan Binondo, 31 anyos, ug ang biktima mao si Arnel Aligato. 25 anyos, ug parehong nanarbaho sa usa ka catering services.
Matud ni Police Master Sergeant Mark Anthony Fat sa Barili PNP nga nanghagad si Binondo og tagay ngadto ni Aligato niadtong Sabado, Pebrero 1.
Base sa imbestigasyon, wala misugot si Aligato sa maong tagay gumikan kay padung kini manarbaho.
Gumikan sa tumang kalagot, dala na usab sa iyang pagkahubog, daling mikuha ang dinakpan sa iyang kutsilyo dayon og dunggab ngadto sa biktima.
Nakaangkon og samad-dinunggaban sa lawas si Aligato ug gidala dayon ngadto sa labing duol nga tambalanan.
Miikyas si Binondo human sa maong panghitabo apan nasikop kini sa mga tanod, dayon og turnover ngadto sa kapulisan.
Nagpaalim sa tambalanan ang biktima samtang mag-atubang ang suspek og kasong frustrated homicide.
