CEBU CITY — Blangko pa ang kapulisan sa motibo sa usa ka lalaki kinsang gipusil patay sa laing riding-in-tandem ug usa ka spotter sa Brgy. Tangke, sa dakbayan sa Talisay.
Giila ang biktima nga si Julius Engbino, 43 anyos, ug residente sa lungsod sa Minglanilla.
Matud ni Patrolman Berdin Bancayan sa Talisay City Police Station nga napalgang patay ang biktima sulod sa abandonadong panimalay sa nahisgutang lugar human nakaangkon og samad-pinusilan sa iyang ulo.
Base sa pasiunang imbestigasyon, miabot sa maong lugar ang wala mailhi nga mga gunmen kinsang nagsakay og motor ug mi-agi pa kini sa interior nga bahin sa panimalay diin anaa si Engbino nianang panahona.
Samtang mi-stambay sa unahan ang usa ka spotter aron magbantay ug pagkahuman sa pagpamusil, mibiya dayon ang tulo ka mga suspek.
Nakuha sa SOCO team ang wala matino nga kabhang sa bala gikan sa nahitaboan sa krimen.
Dugang pa ni Bacayan nga makig-alayon ang Talisay City Police Station sa Minglanilla Municipal Police Station alang sa imbestigasyon sa kamatayon ni Engbino.
Samtang gipangita pa sa kapulisan ang tulo ka mga suspek ubos sa hot pursuit operation.
