CARMEN, CEBU-Tungod sa pagkahinawayon sa usa ka lalaki nga taga Purok Lumboy, Brgy. Cantucong, Carmen, Cebu, tambalanan ang iyang gidangatan human gisaway nga wala’y lami ang tuba sa iyang kainom.
Mao kini ang nahitabo sa managsilingang lalaki diin misangko sa pagpang-abis sa liog ang panag-inum sa duha niadtong Agusto 27, 2024.
Ang biktima nga 61-anyos samtang ang suspek kay 56-anyos, nga usa ka coconut wine gatherer.
Basi sa impormasyon sa Carmen Police Station nga nag-inom ang duha sa usa ka tindahan sa ilahang dapit ug sa dihang nangahubog na, nibutho na ang panaglalis.
Giingong nagsugod ang panaglalis sa dihang gisaway sa biktima ang tuba sa suspek nga wala’y lami ug wala’y ayo kay puti kini.
hinungdan nga nihulbot ang suspek sa iyahang sanggot nga nakahigot sa iyahang hawak ug dayong tigbas sa liog sa biktima.
Nakadagan ang biktima ug nakapangayo’g tabang sa mga silingan.
Dali dayon siya nga gidala sa tambalanan ug padayon nga nagpaalim sa samad nga nahiaguman.
Samtang ang suspek gi-kustodiya na sa kapulisan ug gi-andam na ang kasong Frustrated Homicide batok kaniya.
