Nag viral online ang usa ka video, diin nagpakita sa usa ka lalaki nga gitoohang wala sa sakto nga panimuot, nag dagan-dagan, kalit nga nanapat sa ubang tao, ug manglabni og mga pagkaon sa karendirya nga maagian niini sa dalan sa Consolacion, Cebu.
Ang maong video nakakuha sa kabalaka ug ka-alarma sanglit makahatag kini og risgo sa mga katawhan, apan, sa wala madugay, nadawat kini sa Munisipalidad sa Consolacio, ug daling gi-aksyonan sa PNP Consolacion, Municipal Health Office, ug MSWDO, ubos sa mando ni Mayor Teresa Pepito Alegado, gahapong adllawa, Hunyo 18, 2025.
Atol sa pakighinabi sa Bombo Radyo News team kang Police Lieutenant Rhuffy Federe, Deputy Chief Consolacion Municipal Police, iyahang gi-asoy nga ang maong lalaki usa ka 36-anyos, nga nailhan sa pangalan nga Ferdinand Lopez, taga Amihan Kalunasan, ning Dakbayan sa Sugbo.
Dugang ni PLt Federe, nakadawat na og saktong pag-amuma si Lopez, gani, gipabaton nila kini og proper care kay ilaha kini nga gipaligoan, gipa-inom og pangpakalma, gitupihan, ug dayun gipadala sa Vicente Sotto Memorial Medical Center -Center for Behavioral Sciences (VSMMC-CBS).
Nasayran nga ang pasyente nanginahanglan og dugang nga pagsusi ug pag-atiman sumala sa nagtambong nga Psychiatric Resident.
Bisan paman sa maong panghitabo, gipasalig sa Munispalidad sa publiko nga kontrolado na ang sitwasyon, ang indibidwal anaa na sa pag-atiman sa mga propesyonal, ug wala nay hinungdan sa pagka-alarma. | Bombo Irene Ardiente
