Gideklarar sa Cebu Provincial Government nga gipaubos ang entero probinsya sa “state of preparedness” taliwa sa hulga sa posibleng pagkatap sa 2019-novel coronavirus acute respiratory disease (2019-nCoV ARD).
Ubos sa Executive Order No. 5 nga naaprubahan sa Provincial Board kagahapon, gamiton sa gobyerno sa lalawigan ang ilang disaster funds.
Matud ni Governor Gwendolyn Garcia nga gamiton ang maong pondo alang sa 14-day quarantine sa tanang mga Pilipino nga mibyahe gikan sa mainland China, Hong Kong, ug Macau.
Una nang na-identify sa Department of Health (DOH)-7 ang mga pasilidad nga gamiton isip quarantine areas.
Kini mao ang Eversley Child Sanitarium and General Hospital sa Jagobiao, Mandaue City; Women Development Center sa Lahug, Cebu City; ug usa ka drug rehabilitation center sa lungsod sa Pinamungajan.
Dugang pa ni Garcia nga gipaandam na ang mga pasilidad aron maka-accommodate og gatusan ka mga tawo nga ipaubos sa quarantine.
Sa gihapon, padayon pang nakig-alayon ang provincial government sa mga ahensya aron malikayan ang pagkatap sa maong coronavirus.
