LAPU-LAPU CITY-Andam si Lapu-Lapu City Mayor Junard “Ahong” Chan nga mohatag og cash reward niadtong maka-report ug makadakop sa mga indibidwal nga mihimo og vandalism sa dakbayan.
Gibutyag niini nga subay kini sa paningkamot sa City Government sa pagpanindot sa kadalanan uban sa koordinasyon sa Mactan Artist Guild.
Gitataw sa mayor nga iyang gipintalan og puti ang mga bungbong sa kadalanan gikan sa Barangay Poblacion hangtod na sa Barangay Gun-ob, Pajo, Pusok, Ibo ug Mactan niadtong 2022, isip pagpangandam sa ilang plano nga butangan kini og mural painting.
Nagkanayon si Chan nga andam siyang mohatag ug insentibo nga P10,000 ngadto kang bisan kinsa nga makahatag ug impormasyon sa mga indibidwal nga makaguba sa mga pampublikong paril ug koral, ug P30,000 sa bisan kinsa nga makadakop sa mga malapason.
Ang mga indibidwal nga makahimo og vandalism ug uban pang mga buhat sa malicious mischief nga makaguba sa “clean and green” nga proyekto sa Siyudad kinahanglan nga mobayad og hangtod sa P5,000 isip mga silot ug mahimong mapriso.
Ubos sa Ordinansa 16-055-2022 nga gi-author ni Konsehal Linda Susan Baring ug giaprobahan sa Sangguniang Panlungsod niadtong Nobiyembre 2022, ang mga makalapas mobayad og multa nga P3,000 sa unang kalapasan, P4,000 sa ikaduhang paglapas, ug P5,000 sa ang ikatulo nga paglapas ug pagkabilanggo depende sa pagkabuotan sa korte.
