LAPU-LAPU CITY, CEBU- Gipakusgan karon sa Lapu-Lapu City Police Office (LCPO) ang ilang mga security preparations alang sa Traslacion 2026, aron masiguro ang malinawon, hapsay, ug matinahuron nga pagpatuman sa relihiyosong kalihokan.
Ubos sa pagpangulo ni Police Colonel Antonietto Y. Cañete, Officer-in-Charge sa LCPO, personal nga nagpahigayon og ocular visit ug site inspection sa Nuestra Señora de Regla Parish–National Shrine sa Barangay Poblacion, Lapu-Lapu City, isip kabahin sa komprehensibong pagpangandam sa seguridad.
Gisusi sa kapulisan ang mga entrance ug exit sa simbahan, mga pamaagi sa crowd control, ug ang mga traffic route padulong sa Naval Forces Central (NAVFORCEN), tungod sa gipaabot nga kadaghan sa mga deboto nga motambong sa Traslacion.
Nagpahigayon usab ang LCPO og Pre-Deployment Briefing alang sa ilang mga personnel sa LCPO Grounds sa Barangay Pusok. Gitutukan sa briefing ang operational readiness, hapsay nga koordinasyon, ug hustong deployment sa kapulisan atol sa Traslacion 2026.
Kapin sa 400 ka PNP personnel ang gideploy karon sa LCPO, uban ang suporta sa ubang ahensya sa gobyerno ug force multipliers, aron masiguro ang kaluwasan ug seguridad sa tanang deboto ug manan-aw sa tibuok relihiyosong kalihokan.
Nagpabiling andam ang Lapu-Lapu City Police Office sa pagmintinar sa kalinaw ug kahapsay, pagpalig-on sa police visibility, ug pagpanalipod sa seguridad sa publiko, pinaagi sa hugot nga koordinasyon ug kooperasyon sa komunidad, samtang ginahimo karon ang Traslacion 2026.
