Nipahigayon og sunod-sunod nga airstrike ang Israel sa habagatang Lebanon nga mikalas og labing menos 12 ka mga tawo, lakip ang daghang mga babaye ug mga bata, sumala sa Lebanese health ministry niadtong Lunes.
Nahitabo ang maong pagpamusil taliwala sa nagkataas nga tensyon human sa mga semana nga paghunong sa panag-away. Usa sa pinakagrabe mao ang pagkahugno sa usa ka bilding sa lungsod sa Kfar Rumman nga nakapatay og 11 ka tawo, lakip ang duha ka bata ug upat ka babaye, samtang usa ka 18-anyos nga rescuer ang namatay usab sa laing pag-atake sa lugar.
Gipahibalo sa militar sa Israel nga ipadayon niini ang pag-target sa mga pasilidad ug miyembro sa Hezbollah human kini miingon nga ang mga sundalo niini giatake gamit ang duha ka eksplosibong drone.
Gitawag usab sa Israeli Foreign Ministry ang mga paningkamot sa Hezbollah nga tukuron pag-usab ang gahum militar niini nga usa ka paglapas sa kasabutan sa hunong-buto.
Apan giklaro sa militar sa Israel nga gihatagan gihapon nila og bili ang pag-focus sa pagtuman sa kasabutan samtang giwagtang ang mga hulga sa ilang seguridad.
Sa laing bahin, ang mga opisyal ug residente sa Lebanon nag-ingon nga ang mga lugar nga naigo wala nalambigit sa gubat ug gipuy-an sa ordinaryong mga pamilya.
Bisan pa sa walo ka bulan nga paningkamot sa kalinaw sukad Hunyo, kapin sa 4,300 ka mga tawo ang namatay sa Lebanon sukad miulbo ang gubat niadtong Marso.
Agig tubag sa padayon nga agresyon sa Israel, si Lebanese President Joseph Aoun nanawagan sa Estados Unidos ug sa international community nga motabang sa paghunong sa mga pag-atake.
