DALAGUETE, CEBU-Nitanyag og insentibo nga hangtod sa P30,000 sa tanang senior citizens nga nagpangidaron og 95 anyos pataas ang kagamhanang lokal sa lungsod sa Dalaguete ning habagatang bahin sa Sugbo.
Kini nahisubay sa Municipal Ordinance 2023-303 sa lungsod, nga nagtanyag og insentibo sa mga “Super Seniors”: P10,000 sa mga indibidwal nga nag-edad og 95-anyos, P15,000 sa 96-anyos, P20,000 sa 97-anyos, P25 ,000 sa 98-anyos, ug P30,000 sa 99-anyos.
Kadtong makaabot sa 100-anyos makadawat og P100,000 gikan sa Centennial program sa Department of Social Welfare and Development ug laing P100,000 gikan sa Cebu Provincial Government.
Sumala sa lokalidad sa Dalaguete, ang mga indibidwal nga 101-anyos pataas makadawat og dugang nga insentibo nga nagkantidad og P25,000 matag tuig.
Dugang pa niini nga ang pinansyal nga insentibo usa ka paagi sa pagdasig sa sunod nga henerasyon sa pag-atiman sa ilang panglawas aron mabuhi og taas ug himsog nga kinabuhi.
