CENTRAL VISAYAS-Giturn-over sa Police Regional Office sa Central Visayas (PRO-7) ang kinatibuk-ang 1,461 ka mga armas ug 25 ka mga eksplosibo atol sa pagbisita ni Secretary of the Interior and Local Government Juanito Victor C. Remulla sa dakbayan sa Sugbo.
Diin kini nga mga armas nasakmit ug gi-surrender, ingon man nakompiskar sa gihimong checkpoints, police operations, buy-busts ug pagpatuman sa arrest warrants gikan niadtong Oktubre 1, 2024 hantod na sa Pebrero 3, 2025.
Kabahin kini sa ilang mas gihingusgan nga kampanya batok sa loose firearms ilabi na karon nga nagkaduol na ang National ug Local Elections nga mahitabo karong Mayo 2025.
Sa gipaambit ni Police Colonel Arvie Aserre Paraon-Bueno, ang tigapamaba ni Police Brigadier General Redrico Maranan, ang Regional Director sa PRO7 diin kanunay nga gipahinumdom ni Maranan nga ang matag usa ka armas kay lima ka kinabuhi ang maluwas.
Hinungdan nga sa liboan ka mga armas nga nakumpiskar sa kapulisan kay daghan usab ka kinabuhi ang naluwas.
Mao usab kini ang pamaagi aron mamentinar ang kahapsay ug kalinaw sa rehiyon.
Subay niini, padayon nga giawhag sa kapulisan ang katawhan sa ilang koordinasyon alang sa pakigbisog sa pagpunting sa mga armas nga dili lisensyado o expired na.
Ingon man ang pag-awhag niini sa pagkooperar sa ilang mga operasyon sama sa “Oplan Katok” aron dasigon ang tanan sa pagsunod sa mga balaod.
