Mokabat sa 6,657 ka mga personnel ang gipakatap alang sa 461st Fiesta Señor kick-off ceremony isip kabahin sa hugot nga security measures sa Sinulog 2026.
Ang maong deployment naglangkob sa 2,816 ka sakop sa Philippine National Police (PNP), 1,688 gikan sa Philippine Navy, 637 gikan sa Armed Forces of the Philippines (AFP), 603 ka force multipliers, 324 gikan sa Bureau of Jail Management and Penology (BJMP), 324 gikan sa Cebu City Traffic Office (CCTO), 145 gikan sa Bureau of Fire Protection (BFP), 100 gikan sa Philippine Coast Guard, ug 20 gikan sa Department of Health (DOH).
Samtang sa logistical resources usab, adunay 15 ka mobility, 15 motorcycle, 6 ka fire trucks, 20 water assets, 638 ka radio, 17 ka drone, 12 ka metal detector, 30 ka megaphone ug 1, 605 ka raincoat.
Dugang niini, ang maong deployment ipahinungod sa tanang kalihukan nga may kalabutan sa kasaulogan sa Fiesta Señor.
Sa nahimong pamahayag ni PBGen. Redrico Maranan, ang Regional Director sa PRO7, matod niya nga ang maong pagpang deploy, dakong tabang kini sa operasyon sa mga personahe, ilabi na sa kina unhang command vehicle nga maghimong yawi sa mas paspas nga pagresponde sa bisan unsang insidente.
Samtang gisiguro sa Dakbayan sa Sugbo nga organisado ug hapsay ang pagpatigayon sa mga relihiyosong kalihukan sa 461st Fiesta Señor, diin 70 porsyento na ang kaandam sa Cebu City Government.
Kabahin sa mga nahuman na nga preparasyon ang pagpangandam sa Cebu City Sports Center (CCSC) sa Abellana, lakip ang pagbutang og bleachers sa mga agianan sa parada.
Gidasig usab ang mga establishimento nga ipagamit sa publiko ang ilang mga pansayan alang sa kaluwasan sa mga deboto.
