Pipila ka adlaw nalang gikan karon, ipahigayon na ang ika-limang State of the Nation Address ni President Ferdinand Marcos Jr., ug subay niini, adunay pipila ka mga progresibong grupo nga adunay gilaom sa maong SONA ni PBBM.
Sa eksklusibong pakighinabi sa Bombo Radyo Cebu kang Jaime Paglinawan, Chairperson sa Bayan Central Visayas, iyang gikabutyag nga ilang gi-expect nga ipanghambog o ipasigarbo sa Presidente nga niabot na sa upper level income nga nasud.
Lakip usab niini matod ni Paglinawan, angayan usab nga ipanghambog sa Presidente ang kasulbaran sa kagutom sa nasud pamaagi na sa programang “Walang Gutom,” ug ang usa sa labing init nga hisgutanan ang kabahin sa flood control projects, diin ubos sa administrasyon ni Marcos, aduna na kini napabalhog sa prisohan sa kung kinsa kadtong nalambigit niini.
Apan, giklaro ni Paglinawan nga sa ilahang habig, ang mga nangunang syudad sa tibuok Pilipinas, magpahigayon og protesta usab atol sa deliberasyon sa presidente atol sa SONA.
Kini, matod pa niya, aron mapakita ang tinuod nga kahimtang sa katawhan, diin taliwala giingong lakip na ang nasud sa upper middle income, makita gihapon ang nasinatian sa mga mamumuo ang ubos nga inadlaw-adlaw nga suholan.
Gani, gitataw pa ni Paglinawan nga ang gobeyerno sa Pilipinas nakapokus gihapon sa gitawag nga “band-aid solution,” ug usa na niini ang pagpang apod-apod og pinansyal nga ayuda.
