LAPU LAPU CITY, CEBU-Hingpit na nga andam ang seguridad nga gipatuman sa mga sakop sa kapulisan sa Lapu-Lapu City subay sa ilang pagpangandam sa umaabot nga United Nations Tourism Organization nga ipahigayon sa naasoy nga dakbayan.
Sa pakighinabi sa Bombo Radyo Cebu kang Police Major Michael Gingoyon, ang Chief of Tourist Police Unit sa Lapu-Lapu City Police Office gipaambit niini nga 100 porsyento na nga andam ang tourist police diin sugod karong adlawa, Hunyo 24 gisugdan na ang ilang pre-deployment sa mga kapulisan ubos sa pagdumala sa ilang City Director nga si Coronel Ali Baron.
Gidugang pa sa opisyal nga ang ilang pagpangamdam sa seguridad milungtad kini og 3 ka semana sa wala pa ang ilang deployment hinungdan nga mipasalig ang kapulisan ngadto sa mga motambong nga dili angay mabalaka gumikan sa ilang hugot nga preparasyon nga nagtumong
sa malinawon ug hapsay nga pagpahigayon sa kalihokan.
Una niini, una ng gipahibalo sa Probinsiya sa Sugbo nga adunay labing menos 300 ka mga delegado ang motambong sa United Nations Tourism Organization (UNTO) Joint Commission Forum nga gikatakda gikan sa Hunyo 26 hangtod sa 28.
Diin gikonsiderar usab kini nga makasaysayanon tungod mao kini ang unang UN Tourism Regional Forum on Gastronomy Tourism alang sa Asia ug Pasipiko tungod kay ang Pilipinas ang napili nga mo-host sa maong kalihokan.
