CEBU CITY- Gitan-aw sa kapulisan ang love triangle isip posibleng motibo sa pagpatay kang Jhon Paul Dayupay, 25 anyos, usa ka barbero nga naghuwat usab nga maapil sa listahan sa mga madawat sa Philippine National Police (PNP).
Matod ni Police Captain Meryl Pranza Causin, hepe sa Labangon Police Station, si alyas “Jason” ang gituohang utok sa pagpatay kang Dayupay, base sa ilang padayong imbestigasyon.
Sa pagkakaron, anaa sa Cebu City Jail si Jason human siya gidakop sa Philippine Drug Enforcement Agency-7 niadtong 2023 tungod sa giingong paglapas sa Sections 5 ug 11, Article II sa Republic Act 9165, o Comprehensive Dangerous Drugs Act of 2002.
Sumala sa kapulisan, kanhi kapuyo ni “Charlotte” si Jason, nga gikatahong adunay relasyon kang Dayupay sa dihang nahitabo ang pagpamusil. Matod pa sa mga saksi, giingong gihulga ni Jason ang biktima sa wala pa kini gipusil.
Giila sa mga imbestigador ang tulo ka giingong suspek nga sila si alyas Ruben, 39, taga-F. Jaca Street, Barangay Pardo; alyas Abner, 53, taga-Upper Lucimba, Pardo; ug alyas Niño, 19, taga-Sitio Ylaya, Barangay Candulawan, Dakbayan sa Talisay.
Sumala kang Causin, nasubay sa mga imbestigador ang mga suspek pinaagi sa CCTV footage, diin ilang gisusi ang posibleng agianan sa mga sakyanan nga gigamit sa mga suspek sa pag-ikyas human sa insidente.
Gituohang sila Ruben ug Abner ang mipahigayon sa pagpamusil samtang nagsakay sa usa ka motorsiklo, samtang si Niño ang giingong nagsilbing lookout ug nagsakay sa laing motorsiklo.
Atol sa interogasyon, usa sa mga suspek ang giingong miangkon nga gisuholan sila ni alyas Jason aron ipahigayon ang pagpatay, sumala sa kapulisan.
Padayon ang imbestigasyon sa mga awtoridad aron mapalig-on ang ebidensiya ug matino ang tagsa-tagsa ka papel sa mga nalambigit sa maong krimen.
