CEBU CITY — Posible nga mapun-an pa ang mga nagdagan nga bus kung ugaling mapaubos na sa Modified General Community Quarantine (MGCQ) ang dakbayan ug lalawigan sa Sugbo.
Kini ang gipahibalo ni LTFRB 7 Regional Director Eduardo Montealto, sa dihang nahinabi sa Bombo Radyo Cebu.
Apan gitataw ni Montealto nga mag-depende sa gihapon kini sa rekomendasyon sa namunoan sa mga lokal nga pangagamhanan.
Matud pa nga ang maong rekomendasyon ang mahimong basihan sa ilahang lakang apan giingong anaa usab gihapon sila’y pag-estudyo niini hinungdan nga dili ‘automatic’ ang pagpadagan sa daghang mga bus o modernized jeepneys.
Giklaro usab ni Montealto nga gipatuman pa nila sa pagkakarun ang ‘rationalize route’ hinungdan nga mag-usab-usab pa ang rota sa mga bus.
Hinuon, gisiguro sa LTFRB official nga padayon ang ilahang mga panagpulong kalabot niini arun nga ma-align na ang mga public transport route ug dili na maglisod ang mga sumasakay.
‘Nihit nga transportasyon’
Mipadayag ang presidente sa Cebu Provincial Bus and Mini Bus Operators Transport Cooperative (CPBMTC) nga si Julieto Flores nga kinahanglang igarantiya sa LTFRB-7 nga makahatag og dugang nga prangkisa alang sa mga operators.
Kini aron nga makadeploy ang dugang pang ihap sa mga bus ug minibuses ug sa kadalanan ug masulbad ang pagkanihit niini.
Matud ni Flores, kinsa usab nga acting mayor sa Barili, nga kutob lang sa Talisay City ang pagbyahe sa mga bus ug minibus ug makita nga nihit ang transportasyon sa Cebu City.
Napaglantawan usab niini nga gipatuman gihapon ang limitadong capacity sa mga bus ug minibus hinungdan nga naglisud ang katawhan sa pag-commute ubos sa “new normal.”
Mi-awhag si Flores sa mga kadagkuan sa LTFRB nga pahimuslan ang kasamtangang sitwasyon aron tun-an ang mosunod pang mga lakang sa higayon nga malahos ang pagbyahe sa mga bus ug minibus sa Cebu City.
Dugang pa niini nga aduna na silay pasiunang proposal ngadto sa hingtungdang ahensya alang sa sistema sa paghatag og dugang pang prangkisa sa mga operators. /with reports by Bombo Mich Dialogo/SBR/GN
