Gimanduan sa Land Transportation Franchising and Regulatory Board (LTFRB) ang ilang mga regional offices sa pagtabang sa mga operator ug drayber sa public utility vehicles (PUVs) sa pagkuha og mga giya sa pletihan sa pagpatuman sa bag-ong pletihan.
Kini human gikataho nga dunay mga drayber nga magpanuko sa pagpaningil og dugang plitehan tungod kay wala pa silay fare matrix.
Matod ni LTFRB Acting Chairman Greg Pua Jr., dili na kinahanglang maghuwat pa sa opisyal nga fare matrix aron mapatuman ang giaprobahan nga umento sa plitehan.
Mahimong gamiton una sa mga operator ug drayber sa PUV ang temporaryong giya sa pletihan nga ma-download gikan sa website sa LTFRB.
Ang temporaryong giya sa pamasahe magpabiling balido hangtod sa Disyembre 31, 2026.
Sugod sa Enero 1, 2027, gikinahanglan nga aduna ug ibutang sa ilang mga sakyanan ang opisyal nga fare guide o fare matrix nga ipagawas sa LTFRB.
