Gipahibalo sa Department of Social Welfare and Development (DSWD) nga ilang ipang-apod-apod ang cash aids para sa mga benepisyaryo sa fuel subsidy pinaagi lamang sa e-wallet transfers human namatay ang usa ka rider samtang naglinya sa usa ka payout center sa Quezon City.
Sumala ni DSWD Secretary Rex Gatchalian, ang pag-apod-apod sa umaabot nga mga payout ipahigayon ug idirekta ngadto sa mga e-wallets sa transport network vehicle service (TNVS) ug mga riders sa motorcycle taxi nga nalakip sa listahan sa mga awtorisado nga makadawat sa maong subsidy.
Samtang, giklaro ni Gatchalian nga ang mga listahan sa mga ngalan gibase sa mga gisumite sa Land Transportation Franchising and Regulatory Board (LTFRB) nga iyang giingon nga adunay mga lehitimong drayber.
Personal nga miadto ang kalihim ug nagpahayag sa iyang pahasubo sa pamilya sa namatay nga rider ug naghatag usab og tabang pinaagi sa medikal ug burial assistance ug uban pang mga panginahanglan sa iyang nabilin nga pamilya.
