CEBU – Hagit ang pagpahigayon sa face-to-face nga klase sa tanang lebel sa Central Visayas, partikular sa Metro Cebu alang sa school year 2022-2023, kini ang nakita sa Land Transportation and Franchising and Regulatory Board sa Central Visayas (LTFRB 7).
Matud pa ni LTFRB 7 Director Eduardo Montealto Jr., nga posibleng mosaka ang panginahanglanon sa mga pasahero.
Hinungdan nga kinahanglan pang ilhon sa LTFRB 7 kon asa maggikan ang dakong gidaghanon sa mga tinun-an gawas sa mga tunghaan.
Matod niya nga usa sa ilang adjustment mao ang pagdugang og mga public utility vehicles (PUVs) atol sa peak hours ug ingon man rationalize ang mga rota sa mga lugar nga giila nga adunay daghang sakay.
Nasayran nga dul-an na lang sa 850 ka traditional public utility jeepneys (TPUJs) ang nagpabiling nag-operate sa Cebu City, samtang 650 ka units ang nag-operate sa laing duha ka highly-urbanized nga mga siyudad sa Mandaue ug Lapu-Lapu ug sa mga dakbayan sa Danao ug Talisay.
Samtang moabot usab sa 1,120 ka modernized jeepneys (MPUJs) ang nagbiyahe sa Metro Cebu.
