Gitugyan na sa Land Transportation Office – Central Visayas (LTO-7) ang lima ka mga units sa alcohol breath analyzers (ABAs) niini sa Kagamhanang Lalawigan sa Sugbo isip tubag sa nagkataas nga ihap sa mga aksidente sa kadalanan nga naglakip sa mga hubog nga mga drayber.
Pormal nga gitugyan ang maong mga ekipo niadtong Huwebes, Pebrero 17, 2026 sa Cebu Provincial Capitol kauban ang mga opisyal sa Cebu Police Provincial Office (CPPO) pinaagi sa paglagdaay og Memorandum of Agreement (MOA) sa striktong pagpatuman sa RA 10586 o Anti-Drunk and Drugged Driving Act of 2013.
Gipirmahan ang MOA nilang LTO Chief Assistant Secretary Markus Lacanilao ug ni Cebu Governor Pamela “Pam” Baricuatro kauban ang presensya nila LTO-7 OIC Regional Director Francisco “Franz” Ranches Jr. ug CPPO Provincial Director Police Colonel Abubakar Mangelen Jr.
Ang mga breathalyzers kay magpabiling iya sa LTO-7 apan pagagamiton sa mga deputized personnel sa CPPO sa mga lungsod ug dakbayan sa Sugbo. Ang LTO-7 sab ang responsible sa provision, maintenance, ug periodic calibration niini aron masiguro ang accuracy ug legal admissibility niini sa korte.
Gihimug-atan sa LTO-7 ang importansya sa pagpatuman sa kaluwasan sa mga kadalanan sa tanang mga motorista ug pedestrian sa ilang tinguha nga striktong pagpatuman sa balaod sa mga lagda sa batas trapiko.
